Luk 4:1-13 | EweBEE | STEP | Azɔ Yesu si me Gbɔgbɔ Kɔkɔe la yɔ fũ la dzo le Yɔdan tɔsisia to eye Gbɔgbɔ la kplɔe yi ɖe Yudea ƒe gbedadaƒo afi aɖe.

Luke 4:1-13

Abosam te Yesu kpɔ

(Mateo 4:1-11; Marko 1:12-13)

1 Azɔ Yesu si me Gbɔgbɔ Kɔkɔe la yɔ fũ la dzo le Yɔdan tɔsisia to eye Gbɔgbɔ la kplɔe yi ɖe Yudea ƒe gbedadaƒo afi aɖe. 2 Enɔ afi ma ŋkeke blaene eye Satan va tee kpɔ le ŋkeke siawo katã me. Meɖu naneke le ŋkeke siawo katã me o ale dɔwui vevie.

3 Satan gblɔ nɛ be, “Nenye be Mawu vie neneye tututu la ekema ɖe gbe na kpe siawo be woatrɔ zu abolo.”

4 Yesu ɖo eŋu nɛ be, “Woŋlɔ ɖe Ŋɔŋlɔ Kɔkɔea me be, Menye nuɖuɖu ɖeɖe koe le vevie na amegbetɔ o.”

5 Satan kplɔe yi teƒe kɔkɔ aɖee eye wòɖe xexeame fiaɖuƒe katã fiae le ɣeyiɣi kpui aɖe ko me 6 eye wògblɔ na Yesu be, “Dukɔ nyui siawo katã kple woƒe ŋutikɔkɔewo nye tɔnye eye mate ŋu atsɔe na ame sia ame si melɔ̃. 7 Eya ta ne èdze klo subɔm ko la matsɔ wo na wò.”

8 Yesu ɖo eŋu nɛ be, “Abe ale si woŋlɔ ɖe Ŋɔŋlɔ Kɔkɔea mee ene la, Mawu ɖeka hɔ̃ ko wòle be míasubɔ.” 9 Azɔ Satana gakplɔe yi Yerusalem eye wòtsɔe ɖo gbedoxɔ la ƒe kɔkɔƒe kekeake. Egblɔ nɛ be, “Nenye Mawu vie nènye vavã la, ti kpo tso afi sia. 10 Elabena Ŋɔŋlɔ Kɔkɔe la gblɔ bena, ‘Ade se na eƒe dɔlawo le ŋutiwò be woakpɔ tawò nyuie 11 woatsɔwò ɖe woƒe asiwo me ale be matsɔ wò afɔ axlã ɖe kpe aɖeke o.’”

12 Yesu ɖo eŋu nɛ be, “Ŋɔŋlɔ Kɔkɔe la gblɔ be, ‘Megate Mawu wò Aƒetɔ la kpɔ tamemabutɔe o.’”

13 Esi Satrana wu tetekpɔwo katã nu la, egblẽ Yesu ɖi dzo le egbɔ hena ɣeyiɣi bubu.